12:30:26
28 Aug 2014
Thursday
Facebook
Google Plus
Twitter
Rssfeed

‘ബ്രിക്സ്’ ഉച്ചകോടി നല്‍കുന്ന പ്രതീക്ഷ

‘ബ്രിക്സ്’ ഉച്ചകോടി നല്‍കുന്ന പ്രതീക്ഷ

അഞ്ചുവര്‍ഷം മുമ്പ് ലോകം സാമ്പത്തിക മാന്ദ്യത്തിന്‍െറ പിടിയിലേക്ക് വഴുതി വീഴുന്നതിനിടയിലായിരുന്നു ‘ബ്രിക്സ്’ എന്ന സാമ്പത്തിക സഹകരണ ഗ്രൂപ്പിന്‍െറ പിറവി. മറ്റു പല സാമ്പത്തിക സഹകരണ ഗ്രൂപ്പുകളെപ്പോലെയും ആധിപത്യത്തിനായുള്ള പോരാട്ട വേദി തന്നെയാവും ഈ പുതിയ സഖ്യം എന്ന് കരുതിയിരുന്നവര്‍ ഏറെയായിരുന്നു. എന്നാല്‍, പിറവി എടുത്ത് അഞ്ചുവര്‍ഷം പിന്നിടുമ്പോഴേക്കും ബ്രസീല്‍, റഷ്യ, ഇന്ത്യ, ചൈന, ദക്ഷിണാഫ്രിക്ക എന്നീ പഞ്ച സാമ്പത്തികശക്തികളുടെ സഹകരണം ലോക സാമ്പത്തികക്രമം തന്നെ മാറ്റിയെഴുതാന്‍ തക്ക ശക്തിയായി വളര്‍ന്നിരിക്കുന്നു. ദക്ഷിണാഫ്രിക്കയിലെ ദര്‍ബനില്‍ കഴിഞ്ഞ ആഴ്ച നടന്ന ബ്രിക്സ് ഉച്ചകോടി ഫലത്തില്‍ ഇതിന്‍െറ വിളിച്ചോതല്‍ ആയി മാറി. കഴിഞ്ഞവര്‍ഷം ദല്‍ഹിയില്‍ നടന്ന ബ്രിക്സ് ഉച്ചകോടിയില്‍ ഇന്ത്യയാണ് വളര്‍ന്നുവരുന്ന സമ്പദ് വ്യവസ്ഥകളില്‍ ഉണ്ടാകുന്ന പ്രതിസന്ധി നേരിടാന്‍ 10,000 കോടി ഡോളറിന്‍െറ അത്യാവശ്യ ഫണ്ടും ബ്രിക്സ് രാജ്യങ്ങളിലെ അടിസ്ഥാന സൗകര്യ വികസനത്തിന് സാമ്പത്തിക സഹായം ലഭ്യമാക്കാന്‍ ബ്രിക്സ് ബാങ്കും രൂപവത്കരിക്കാനുള്ള നിര്‍ദേശം മുന്നോട്ടുവെച്ചത്. ദര്‍ബന്‍ ഉച്ചകോടി ഈ രണ്ടു നിര്‍ദേശങ്ങളും അംഗീകരിച്ചത് ഇന്ത്യ ഉള്‍പ്പെടെയുള്ള വികസ്വര രാജ്യങ്ങളിലെ വികസനത്തിനും വളര്‍ച്ചക്കും പുതിയൊരു ദിശ ലഭ്യമാക്കും.
കഴിഞ്ഞ ഒരു വര്‍ഷത്തിനിടയില്‍ സാമ്പത്തിക വളര്‍ച്ചയുടെ വേഗത കുറഞ്ഞിട്ടുണ്ടെങ്കിലും ലോകത്തെ മറ്റു രാജ്യങ്ങളെ അപേക്ഷിച്ച് മികച്ച വളര്‍ച്ചയാണ് ബ്രിക്സിലെ ഇന്ത്യയും ചൈനയും റഷ്യയും ബ്രസീലും പ്രകടമാക്കുന്നത്. ഈ വളര്‍ച്ച വൈകാതെ ബ്രിക്സ് രാജ്യങ്ങളെ ലോകത്തെ നിര്‍ണായക സാമ്പത്തിക ശക്തിയാക്കി മാറ്റുമെന്നാണ് വിലയിരുത്തപ്പെടുന്നത്. ലോക ജനസംഖ്യയുടെ 43 ശതമാനം വസിക്കുന്നത് ‘ബ്രിക്സ്’ രാജ്യങ്ങളിലാണ്. രാജ്യാന്തര മൂലധന നിക്ഷേപത്തില്‍ 53 ശതമാനം എത്തുന്നതും ഈ രാജ്യങ്ങളിലാണ്. എന്നാല്‍, ആഗോള വ്യാപാരത്തില്‍ ബ്രിക്സ് രാജ്യങ്ങളുടെ പങ്ക് 18 ശതമാനം മാത്രമാണ്. 2000ത്തില്‍ ആഗോള മൊത്ത ഉല്‍പാദനത്തിന്‍െറ 16 ശതമാനമായിരുന്നു ‘ബ്രിക്സ്’ രാജ്യങ്ങളുടെ പങ്ക്. 2010ല്‍ ഇത് 25 ശതമാനമായി. ‘ബ്രിക്സ്’ രാജ്യങ്ങളുടെ സംയുക്ത മൊത്ത ആഭ്യന്തര ഉല്‍പാദനത്തില്‍ 2011ല്‍ ഉണ്ടായ വര്‍ധന 2.3 ലക്ഷം കോടി ഡോളറാണ്. ലോകത്തെ സമ്പന്ന ശക്തികളില്‍ ഒന്നായ ഇറ്റലിയുടെ മൊത്ത ആഭ്യന്തര ഉല്‍പാദനത്തിന് തുല്യമാണിത്. ലോകത്തെ പ്രമുഖ റേറ്റിങ് സ്ഥാപനങ്ങളുടെ കണക്കുകള്‍ പ്രകാരം 2015ഓടെ ‘ബ്രിക്സ്’ രാജ്യങ്ങളുടെ സംയുക്ത ആഭ്യന്തര ഉല്‍പാദനം യു.എസ് സമ്പദ് വ്യവസ്ഥയെ മറികടക്കുമെന്നും വ്യക്തമാക്കുന്നു. 2027ഓടെ ലോകത്തെ സാമ്പത്തിക ശക്തികളായ ജി7 രാജ്യങ്ങളുടെ സംയുക്ത ആഭ്യന്തര ഉല്‍പാദനത്തെയും മറികടക്കും.
ഇതോടെ ആഗോള വ്യാപാരത്തില്‍ ‘ബ്രിക്സ്’ രാജ്യങ്ങള്‍ക്ക് കൂടുതല്‍ പങ്ക് ലഭ്യമാകുകയും ഈ രാജ്യങ്ങളിലെ ജനങ്ങളുടെ സാമ്പത്തിക വളര്‍ച്ചക്ക് ഗുണകരമായി മാറുകയും ചെയ്യുമെന്ന് വിലയിരുത്തപ്പെടുന്നു. എന്നാല്‍, ഇതിനുള്ള ഏക തടസ്സം ഊര്‍ജം ഉള്‍പ്പെടെയുള്ള കാര്യങ്ങളിലെ അടിസ്ഥാന സൗകര്യങ്ങളുടെ അപര്യാപ്തതയാണ്. ഇതിനുള്ള പരിഹാരമാണ്് കഴിഞ്ഞ ദിവസം ദര്‍ബനിലെ ബ്രിക്സ് ഉച്ചകോടിയില്‍ അംഗീകരിക്കപ്പെട്ട സാമ്പത്തിക സഹായ ഫണ്ടും ബ്രിക്സ് ബാങ്കും.
ഇന്ത്യന്‍ വിപണിയില്‍ ആവശ്യത്തിന് ഭക്ഷ്യ ഉല്‍പന്നങ്ങള്‍ ലഭിക്കാതെ വിലക്കയറ്റം നേരിടുമ്പോഴും നൂറുകണക്കിന് ടണ്‍ പച്ചക്കറികള്‍ ഉള്‍പ്പെടെയുള്ള ഭക്ഷ്യവസ്തുക്കളാണ് സംഭരണശാലകളില്ലാതെ നശിക്കുന്നത്. ഇത് കര്‍ഷകര്‍ക്ക് കനത്ത നഷ്ടം ഉണ്ടാക്കും. സംഭരിച്ച് അത് കേടുകൂടാതെ വിപണികളില്‍ എത്തിക്കാന്‍ ആവശ്യമായ അടിസ്ഥാന സൗകര്യങ്ങളുടെ വികസനത്തിനുമാത്രം ഇന്ത്യയില്‍ ഏതാണ്ട് രണ്ടുലക്ഷം കോടി രൂപയുടെ (ഏകദേശം 4000 കോടി ഡോളര്‍) നിക്ഷേപമാണ് ആവശ്യം. നിലവിലെ സാഹചര്യത്തില്‍ കേന്ദ്രസര്‍ക്കാറിന് ഇത്ര വലിയ നിക്ഷേപം നടത്തുക സാധ്യമല്ല. രാജ്യാന്തര വികസന ധനകാര്യ ഏജന്‍സികളായ ലോക ബാങ്കും ഏഷ്യന്‍ വികസന ബാങ്കും ആവശ്യമായ തുക ലഭ്യമാക്കുന്നുമില്ല. എന്നാല്‍, ഇന്ത്യക്ക് നിര്‍ണായക സ്വാധീനമുള്ള ‘ബ്രിക്സ് ബാങ്ക്’ ഒരുപക്ഷേ, ഈ പ്രതിസന്ധിക്ക് പരിഹാരമായേക്കും. ഇതുപോലെ ഊര്‍ജം, തുറമുഖങ്ങള്‍, റോഡ് തുടങ്ങിയ അടിസ്ഥാന സൗകര്യങ്ങളുടെ വികസനത്തിന് ആവശ്യമായ നിക്ഷേപങ്ങള്‍ക്കും ബ്രിക്സ് ബാങ്ക് തുണയാകും.
ആഗോള വ്യാപാരത്തില്‍ 25 ശതമാനം പങ്കാളിത്തം ഇപ്പോള്‍ ബ്രിക്സ് രാജ്യങ്ങള്‍ക്കുണ്ടെങ്കിലും ഈ രാജ്യങ്ങളുടെ വ്യാപാരത്തില്‍ 10 ശതമാനം മാത്രമാണ് പരസ്പരം നടക്കുന്നത്. ഇതിന് പ്രധാന കാരണം ഇറക്കുമതിക്കാവശ്യമായ ലെറ്റര്‍ ഓഫ് ക്രെഡിറ്റ് സൗകര്യം ഈ രാജ്യങ്ങളിലെ ബാങ്കുകള്‍ തമ്മില്‍ അത്ര വ്യാപകമായി ഇല്ലാത്തതാണ്. ഇക്കാര്യത്തിലും മാറ്റങ്ങള്‍ക്കുള്ള നിര്‍ദേശങ്ങളാണ് ഉയര്‍ന്നിരിക്കുന്നത്. ബ്രിക്സ് രാജ്യങ്ങളിലെ ബാങ്കുകള്‍ തമ്മിലെ സഹകരണം ശക്തമാകുന്നതോടെ പ്രാദേശിക കറന്‍സിയില്‍തന്നെ വിദേശ വ്യാപാരത്തിന്‍െറ പണം ലഭ്യമാക്കാന്‍ കഴിയും. ഇത് ഇറക്കുമതിക്ക് ഡോളറിനെ അമിതമായി ആശ്രയിക്കുന്നത് ഒഴിവാക്കാന്‍ സഹായിക്കും. വിദേശ നാണയം വേണ്ടാതെ വരുന്നതോടെ ബ്രിക്സ് രാജ്യങ്ങള്‍ തമ്മിലുള്ള വ്യാപാരത്തില്‍ വന്‍ കുതിച്ചുചാട്ടം ഉണ്ടാകുമെന്നാണ് വിലയിരുത്തപ്പെടുന്നത്. സാമ്പത്തിക പ്രതിസന്ധി നേരിടാനുള്ള അടിയന്തര ഫണ്ടും ഏറെ ഗുണകരമാകും. ഇന്ന് സാമ്പത്തിക പ്രതിസന്ധിയില്‍ അകപ്പെടുന്ന രാജ്യങ്ങള്‍ കൈനീട്ടുന്നത് ഐ.എം.എഫിനു നേരെയാണ്. ഈ തക്കത്തിന് അവര്‍ സമ്പന്ന രാജ്യങ്ങള്‍ക്കാവശ്യമായ സാമ്പത്തിക നയങ്ങള്‍ വികസ്വര രാജ്യങ്ങളില്‍ അടിച്ചേല്‍പിക്കാനാണ് ശ്രമിക്കാറ്. ഈ അവസ്ഥക്കും മാറ്റമുണ്ടാവും.
ഇത്തരം ഒരു പുതിയ സാമ്പത്തികക്രമം വിദേശ നാണയ ശേഖരം എന്തു ചെയ്യുമെന്ന വികസ്വര രാജ്യങ്ങളുടെ പ്രതിസന്ധിക്കും പരിഹാരമുണ്ടാക്കും. 28,000 കോടി ഡോളറാണ് ഇന്ത്യയുടെ വിദേശ നാണയ ശേഖരം. ചൈനക്ക് അതിന്‍െറ മൂന്ന് മടങ്ങോളമുണ്ട്. ഈ തുകയെല്ലാം അമേരിക്കയുടെ കടപ്പത്രങ്ങളില്‍ തുച്ഛമായ പലിശനിരക്കില്‍ നിക്ഷേപിക്കുകയാണ് പതിവ്. ഇറക്കുമതി ആവശ്യങ്ങള്‍ക്ക് വിദേശ നാണയശേഖരം ആവശ്യമായതിനാല്‍ ഈ തുക രാജ്യത്തെ വികസനപ്രവര്‍ത്തനങ്ങള്‍ക്ക് വിനിയോഗിക്കാന്‍ ഇപ്പോള്‍ കഴിയുന്നില്ല.
എന്നാല്‍, ഈ തുക ബ്രിക്സിനു കീഴില്‍ വരുന്ന ബാങ്കിലോ അടിയന്തര പ്രതിസന്ധി ഫണ്ടിലോ നിക്ഷേപിച്ച് ഈ പണം വികസന പ്രവര്‍ത്തനങ്ങള്‍ക്കുള്ള വായ്പയാക്കി മാറ്റാന്‍ കഴിഞ്ഞാല്‍ അത് ഇന്ത്യക്ക് മാത്രമല്ല, മറ്റ് വികസ്വര രാഷ്ട്രങ്ങള്‍ക്കും നേട്ടമാകും. ഇത്തരമൊരു സഹകരണം സാധ്യമാണെന്ന് വെനിസ്വേലയുടെ അന്തരിച്ച പ്രസിഡന്‍റ് ഊഗോ ചാവെസ് തെളിയിച്ചിട്ടുമുണ്ട്. അദ്ദേഹം യു.എസ് കടപ്പത്രങ്ങളില്‍നിന്ന് നിക്ഷേപങ്ങള്‍ പിന്‍വലിച്ചുവരെ ദക്ഷിണ അമേരിക്കന്‍ രാജ്യങ്ങള്‍ക്ക് വായ്പ നല്‍കി, ഈ രാജ്യങ്ങള്‍ക്കിടയിലെ സഹകരണം മെച്ചപ്പെടുത്തി. ചാവെസ് അമേരിക്കയുടെ കണ്ണിലെ കരടായി മാറിയതിന്‍െറ ഒരു കാരണം ഇതായിരുന്നു. ഊഗോ ചാവെസിന്‍െറ സ്ഥാനത്ത് ഇനി ‘ബ്രിക്സ്’ വരുമോയെന്നത് വരുംനാളുകളിലെ ചോദ്യമായി അവശേഷിക്കും.


നിങ്ങളുടെ അഭിപ്രായങ്ങള്‍

ഇവിടെ കൊടുക്കുന്ന അഭിപ്രായങ്ങള്‍ മാധ്യമത്തിന്റെ അഭിപ്രായമാവണമെന്നില്ല.
Please Note:
അഭിപ്രായങ്ങള്‍ മലയാളത്തിലോ ഇംഗ്ലീഷിലോ എഴുതുക. മംഗ്ലീഷില്‍ എഴുതുന്ന അഭിപ്രായങ്ങള്‍ പോസ്റ്റ് ചെയ്യുന്നതല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.
comments powered by Disqus