യു.എ.ഇയിൽ നാളെ മുതൽ ​ െ​പട്രോൾവില കുറയും 

അബൂദബി: യു.എ.ഇയിൽ ബുധനാഴ്​ച മുതൽ പെട്രോൾ വില നാല്​ ശതമാന​ത്തിലധികം കുറയും. അതേസമയം, ഡീസൽ വിലയിൽ നേരിയ വർധനയുണ്ടാകും. 
സൂപ്പർ 98 പെട്രോൾ ലിറ്ററിന്​ 2.03 ദിർഹമായിരിക്കും നവംബറിലെ വിലയെന്ന്​ യു.എ.ഇ ഉൗർജ മന്ത്രാലയം അറിയിച്ചു. 2.12 ദിർഹമായിരുന്നു ഒക്​ടോബറിലെ വില. 4.25 ശതമാനമാണ്​ കുറഞ്ഞത്​. സ്​പെഷൽ 95 പെട്രോൾ ലിറ്ററിന്​ 4.48 ശതമാനം വില കുറയും. 2.01 ദിർഹത്തിൽനിന്ന്​ 1.92 ദിർഹമായാണ്​ കുറയുന്നത്​. ഇ പ്ലസ്​ പെട്രോൾ ലിറ്ററിന്​ 1.94 ദിർഹമായിരുന്നത്​ 1.85 ദിർഹമായാണ്​ കുറയുക. 4.64 ശതമാനമാണ്​ ഇ പ്ലസ്​ വിലയിൽ കുറവുണ്ടാവുക. എന്നാൽ, ഡീസൽവില 0.5 ശതമാനം വർധിക്കും. ലിറ്ററിന്​ 2.11 ദിർഹമായിരിക്കും നവംബറിലെ ഡീസൽ വില. 

രണ്ട്​ വർഷത്തോളമായി യു.എ.ഇയിലെ ഇന്ധനവില വിപണി വിലയിലെ ഏറ്റക്കുറച്ചിലിനെ ആശ്രയിച്ചാണിരിക്കുന്നത്​. ബെഞ്ച്​മാർക്ക്​ വിലയെ അടിസ്​ഥാനമാക്കി രാജ്യത്തെ എണ്ണവില നിശ്ചയിക്കാൻ ഉൗർജ മന്ത്രാലയം തീരുമാനിച്ചത്​ മുതലാണിത്​. അതേസമയം, ആഗോള എണ്ണ വിപണിയിൽ ക്രൂഡ്​ ഒായിൽ വില രണ്ട്​ വർഷത്തിനിടയിലെ ഏറ്റവും ഉയർന്ന നിലയിലെത്തിയ സാഹചര്യത്തിലാണ്​ ഇപ്പോൾ രാജ്യത്ത്​ പെട്രോൾ വില കുറഞ്ഞിരിക്കുന്നത്​. ബാരലിന്​ 60 യു.എസ്​ ഡോളറാണ്​ ആഗോള വിപണിയിൽ ക്രൂഡ്​ ഒായിൽ വില. 

2015 പകുതിക്ക്​ ശേഷമുള്ള ഏറ്റവും ഉയർന്ന വിലയാണിത്​. എണ്ണ ഉൽപാദനം കുറച്ച നടപടി തുടരാൻ നവംബറിൽ നടക്കുന്ന യോഗത്തിൽ ഒപെക്​ തീരുമാനമെടുക്കു​േമ്പാൾ സൗദി അറേബ്യയുടെ പിന്തുണയുണ്ടാവുമെന്ന്​ സൗദി കിരീടാവകാശി സൂചിപ്പിച്ചതോടെയാണ്​ ക്രൂഡ്​ ഒായിൽ വില വർധിച്ചത്​. കുർദുകളും ഇറാഖും തമ്മിലുള്ള സംഘർഷം കാരണം ഇറാഖിന്​ കൂടുതൽ എണ്ണ വിപണിയിലെത്തിക്കാൻ കഴിയില്ലെന്ന ആശങ്കയും വിലവർധനക്ക്​ കാരണമായി. അടുത്ത വർഷം എണ്ണവില ബാരലിന്​ ശരാശരി 56 ഡോളർ ആയിരിക്കുമെന്നാണ്​ ലോകബാങ്ക്​ പ്രവചിക്കുന്നത്​. ഇൗ വർഷത്തെ ശരാശരി 53 ഡോളറാണ്​.