ദുബൈ ഫ്രെയിമും സഫാരിയും ഇനി കൂടുതൽ നേരം, കൂടുതൽ ആനന്ദം

ദുബൈ:  ഇന്ന്​ മുതൽ ദുബൈ ഫ്രെയിമിലേറിയാൽ പുതിയ ദുബൈയും പഴയ ദുബൈയും മാത്രമല്ല  രാക്കാഴ്​ചകളും ആസ്വദിക്കാം. നഗരത്തിലെ പുത്തൻ വിസ്​മയങ്ങളായ ദുബൈ ഫ്രെയിമും ദുബൈ സഫാരിയും ഇന്നു മുതൽ കൂടു തൽ നേരം പ്രവർത്തിക്കും. ദ​ുബൈയിലെ താമസക്കാരുടെയും സഞ്ചാരികളുടെയും ആഗ്രഹം പരിഗണിച്ച്​ സമയമാറ്റം അംഗീകരിച്ച വിവരം സാമൂഹിക മാധ്യമങ്ങളിലൂടെയാണ്​ നഗരസഭ അറിയിച്ചത്​. ദുബൈ ഫ്രെയിം രാവിലെ ഒമ്പതു മുതൽ രാത്രി ഒമ്പതു മണിവരെയാണ്​​ പ്രവർത്തിക്കുക. നിലവിൽ രാവിലെ പത്ത്​ മുതൽ രാത്രി ഏഴു മണി വരെയാണ്​ പ്രവർത്തനം. 

സബീൽ പാർക്ക്​ ഗേറ്റ്​ നമ്പർ നാലിലൂടെ പ്രവേശിച്ചാണ്​ ഫ്രെയിമിലെത്തേണ്ടത്​. മുതിർന്നവർക്ക്​ 50 ഉം മൂന്നിനും 12നും ഇടയിൽ പ്രായമുള്ള കുഞ്ഞുങ്ങൾക്ക്​ 20 ഉം ദിർഹമാണ്​ ടിക്കറ്റ്​ നിരക്ക്​.  മുതിർന്ന പൗരൻമാർക്കും ശാരീരിക വ്യതിയാനമുള്ളവർക്കും അവരുടെ സഹയാത്രികർക്കും സൗജന്യ പ്രവേശനം ലഭിക്കും. 
ദുബൈ സഫാരി പാർക്ക്​ രാവിലെ ഒമ്പതു മുതൽ രാത്രി ഏഴു മണി വരെയാണ്​ പ്രവർത്തിക്കുക.  പ്രവേശന കവാടത്തിനു പുറമെ മൊബൈൽ ആപ്പ്​ മുഖേനയോ www.dubaisafari.ae വെബ്​സൈറ്റ്​ വഴിയോ ടിക്കറ്റെടുക്കാം. 

ദുബൈ സഫാരി പാർക്ക്​, സഫാരി വില്ലേജ്​ എന്നിവിടങ്ങളിലേക്ക്​ പ്രവേശനത്തിനുള്ള ടിക്കറ്റിന്​ മുതിർന്നവർക്ക്​ 85ഉംകുഞ്ഞുങ്ങൾക്ക്​ 30 ദിർഹവുമാണ്​ നിരക്ക്​.  മുതിർന്ന പൗരൻമാർക്കും ശാരീരിക വ്യതിയാനമുള്ളവർക്കും അവരുടെ സഹയാത്രികർക്കും സൗജന്യ പ്രവേശനം ലഭിക്കും.