സവാരീഖ്​ സൂഖിൽ പരിശോധന: 38 ടൺ കേടായ ഭക്ഷ്യവസ്​തുക്കൾ പിടിച്ചെടുത്തു

ജിദ്ദ: ജിദ്ദയുടെ തെക്ക്​ ഹറാജ്​ സവാരീഖ്​ സൂഖിൽ നടത്തിയ പരിശോധനയിൽ 38 ടൺ കേടായ ഭക്ഷ്യവസ്​തുക്കൾ ബലദിയ ഉദ്യോഗസ്​ഥർ പിടിച്ചെടുത്തു. ബലദിയ ജനൂബിയ ഉദ്യോഗസ്​ഥരാണ്​ പരിശോധന നടത്തിയത്​. പത്ത്​ ടൺ ഉപയോഗിച്ച വസ്​ത്രങ്ങളും പിടിച്ചെടുത്തിട്ടുണ്ട്​. നിയമലംഘകരായ വഴിവാണിഭക്കാരിൽ നിന്നാണ്​ ഇത്രയും വസ്​തുക്കൾ പിടിച്ചെടുത്തത്​. നിയമലംഘനങ്ങൾ തടയാൻ പൊലീസുമായി സഹകരിച്ചു ഹറാജ്​ സൂക്കിൽ പരിശോധന തുടരുമെന്ന്​ ബലദിയ ജനൂബ്​ മേധാവി എൻജിനീയർ അഹ്​മദ്​ സഹ്​റാനി വ്യക്​തമാക്കി. 

30 കച്ചവട കേന്ദ്രങ്ങൾ സ്​ഥലത്തുണ്ട്​. ലൈസൻസില്ലാതെ പ്രവർത്തിച്ച നിരവധി ഗോഡൗണുകളും ഉപയോഗിച്ച വസ്​തങ്ങൾ വിൽക്കുന്ന കടകളും അടച്ചുപൂട്ടിയിട്ടുണ്ട്​. പിടിച്ചെടുത്ത വസ്​തുക്കൾ നശിപ്പിച്ചു​. ജുബ്​ന, പാൽപ്പൊടി, ബിസ്​ക്കറ്റ്​, വിവിധതരം പാക്കറ്റ്​ ഭക്ഷ്യവസ്​തുക്കൾ എന്നിവ പിടിച്ചെടുത്തതിലുൾപ്പെടുമെന്നും ബലദിയ ഒാഫീസ്​ മേധാവി പറഞ്ഞു.