മരുഭൂജീവിതങ്ങൾക്ക് സാന്ത്വനമായി ഇഫ്താർ

യാമ്പു: മരുഭൂമിയിലെ തൊഴിലാളികളെ രണ്ടര പതിറ്റാണ്ട് കാലമായി നോമ്പ് തുറപ്പിക്കുകയാണ് ഒരു കൂട്ടം സന്നദ്ധ പ്രവർത്തകർ. യാമ്പു റോയൽ കമീഷനിലെ ഉദ്യോഗസ്ഥനായ ശ്രീലങ്കൻ  സ്വദേശി ഉമർ അബ്‌ദുറഹ്‌മാ​​​​​െൻറ നേതൃത്വത്തിൽ മയിലുകൾ താണ്ടിയാണ് മുടക്കമില്ലാതെ മുന്നൂറോളം പേർക്ക് ഇഫ്താറിന് ആവശ്യമായ ഭക്ഷ്യവിഭവങ്ങൾ  ദിവസവും ഇവിടെ ഒരുക്കുന്നത്. കൃഷിയിടങ്ങളും ലേബർ ക്യാമ്പുകളും കൂടുതലുള്ള പ്രദേശത്ത് ആരാംകോയുടെ ഒരു 'ഇസ്തിറാഹ' യിലാണ്   നോമ്പുതുറ സംഘടിപ്പിക്കുന്നത്​. സുഡാൻ, പാക്കിസ്ഥാൻ, ബംഗ്ലാദേശ്, ഇന്ത്യ, ശ്രീലങ്ക തുടങ്ങിയ രാജ്യങ്ങളിലെ  ചുരുങ്ങിയ വേതനത്തിന് വ്യവസായ ശാലകളിലും കൃഷിയിടങ്ങളിലുമായി തൊഴിലെടുക്കുന്നവരാണ് ഇവിടെ നോമ്പ് തുറക്കാൻ എത്തുന്നത്. ജോലി കഴിഞ്ഞ് വൈകുന്നേരം ക്യാമ്പിലെത്തി ഭക്ഷണം പാകം ചെയ്യാൻ സാധിക്കാത്ത തൊഴിലാളികള്‍ക്ക് വലിയ അനുഗ്രഹമാണ് മരുഭൂമിയിലെ  ഈ നോമ്പുതുറ. സുമനസുകളായ സമ്പന്നരായ സ്വദേശിവ്യക്തികൾ നൽകുന്ന ഫണ്ടും സ്പോൺസർ ചെയ്ത വിഭവങ്ങളും ഈ ഇഫ്താർ സംഗമത്തിന് സഹായകമാവുന്നു. പലരും ഈ  കൂട്ടായ്മക്ക് നിറഞ്ഞ പിന്തുണയുമായി മുന്നോട്ടു വരുന്നുണ്ട്. തൊഴിലാളികളുടെ കൂടെ 20 വർഷത്തോളം  മുടങ്ങാതെ നോമ്പ് തുറക്കാൻ താൻ വരാറുണ്ടെന്നും സാധാരണക്കാരോടൊത്ത് ഇഫ്താറിൽ പങ്കുചേരുന്നത്​ വലിയ സന്തോഷമാണെന്നും  നേതൃത്വം നൽകുന്ന അബ്​ദുറഹ്​മാൻ  പറഞ്ഞു. മരുഭൂമിയിലൂടെ കുണ്ടും കുഴിയുമുള്ള റോഡിലൂടെ വേണം  പ്രദേശത്തെത്താൻ.  പ്രവാസികളുടെ പതിവ് വിഭവങ്ങളായ പഴവർഗങ്ങളും, സൂബിയയും, ജ്യൂസും, സൂപ്പും, കടല വേവിച്ചതും, ബിരിയാണിയുമാണ് മുഖ്യ ഇനങ്ങൾ. നോമ്പ് തുറക്കെത്തുന്നവർക്ക് വിവിധ ഭാഷകളിൽ റമദാൻ സന്ദേശം നൽകാനും ഇവിടെ സംവിധാനം ഒരുക്കിയിട്ടുണ്ട്.