പുസ്​തകമേളയിലേക്ക്​ സന്ദർശക ​പ്രവാഹം; മൂന്നുദിവസത്തിൽ ഒന്നേകാൽ ലക്ഷം

ജിദ്ദ: മൂന്നാമത്​ ജിദ്ദ അന്താരാഷ്​ട്ര പുസ്​തകമേള കാണാൻ സന്ദർശക പ്രവാഹം. മേള തുടങ്ങി മൂന്ന്​ ദിവസം പിന്നിട്ടപ്പോഴേക്കും സന്ദർശകരുടെ എണ്ണം 1,20,000 കവിഞ്ഞതായാണ്​ റിപ്പോർട്ട്​. ‘പുസ്​തകം സംസ്​കാരമാണ്​’ എന്ന തലക്കെട്ടി​െലാരുക്കിയ മേള കഴിഞ്ഞ ബുധനാഴ്​ചയാണ്​ മക്ക ഗവർണർ അമീർ ഖാലിദ്​ അൽഫൈസൽ ഉദ്​ഘാടനം ചെയ്​തത്​. വ്യാഴം മുതലായിരുന്നു​ സന്ദർശകർക്ക്​ പ്രവേശനം നൽകിയത്​. അവധി ദിവസങ്ങളായതിനാൽ സ്വദേശികളും വിദേശികളുമായ നിരവധി ആളുകളാണ്​ മേള കാണാനെത്തിയത്​. 

​മൂന്ന്​ പ്രധാന കവാടങ്ങളും ആറ്​ ചെറിയ കവാടങ്ങളും സന്ദർശകർക്കായി ഒരുക്കിയിട്ടുണ്ട്​. സ്​റ്റാളുകൾ പ്രവർത്തിക്കുന്ന സ്​ഥലവും പുസ്​തകം കണ്ടെത്താനും പ്രത്യേക സംവിധാനങ്ങളുണ്ട്​. ​രാജ്യത്തിനകത്തും പുറത്തുമുള്ള 500 ലധികം പ്രസാധകർ പ​െങ്കടുക്കുന്ന മേളയിൽ സാഹിത്യത്തിന്​ പുറമെ ചരിത്രം, ശാസ്​ത്രം​, ഭാഷാപഠനം, ആരോഗ്യം, നിഘണ്ടുകൾ തുടങ്ങിയ വിഷയങ്ങളിലായി 3.5 ദശലക്ഷം പുസ്​തകങ്ങളുണ്ട്​. ബാലസാഹിത്യത്തിനും നോവലുകൾക്കും സൗന്ദര്യം, പാചകം എന്നിവയുമായി ബന്ധപ്പെട്ട പുസ്​തകങ്ങൾക്കുമാണ്​ ഏറെ പ്രിയം​. മേളയുടെ വിവിധ ഭാഗങ്ങളിൽ കാലിഗ്രഫികളും വിവിധ രാജ്യങ്ങളുടെ തനതുകലകളും തുറന്നുകാട്ടുന്നതിനായി പ്രത്യേക സ്​ഥലവും ഒരുക്കിയിട്ടുണ്ട്​. 

ദിവസം സാംസ്​കാരിക വിനോദ പരിപാടികളും ഉണ്ട്​. കുട്ടികൾക്കായുള്ള സിനിമകളും ഡ്രാമകളും ഉൾപ്പെടും. പൊലീസ്​, ട്രാഫിക്​, റെഡ്​ക്രസൻറ്​, ആരോഗ്യകാര്യാലയം തുടങ്ങിയ വകുപ്പുകൾ സേവന നിരതരാണ്​​. മൂന്ന്​ ദിവസത്തിനുള്ളിൽ 15 ഒാളം പേർക്ക്​ പ്രാഥമിക ശുശ്രുഷാ​ സേവനം ലഭ്യമാക്കിയതായി റെഡ്​ക്രസൻറ്​ വക്​താവ്​ അബ്​ദുല്ല അഹ്​മദ്​ അബൂസൈദ്​ പറഞ്ഞു. മേളയുടെ വടക്ക്​, തെക്ക്​ ഗേറ്റുകൾക്ക്​ ആറ്​ ആംബുലൻസുകൾ ഒരുക്കിയിട്ടുണ്ട്​. ഇതിനുപുറമെ ഗോൾഫ്​ വണ്ടികളുമുണ്ട്​. മേള കഴിയുന്നതുവരെ സേവനത്തിന്​ അഞ്ച്​ സംഘങ്ങൾ സ്​ഥലത്തുണ്ടെന്നും റെഡ്​ക്രസൻറ്​ വക്​താവ്​ പറഞ്ഞു. പത്ത്​ ദിവസം നീണ്ടു നിൽക്കുന്ന മേള ഇൗമാസം 24 ന് അവസാനിക്കും.