ദേശീയ ദിനാഘോഷം: ഒരുക്കങ്ങള്‍ പൂര്‍ത്തിയായതായി കാപിറ്റല്‍ സെക്രട്ടേറിയറ്റ് 

മനാമ: തലസ്ഥാന നഗരി കേന്ദ്രീകരിച്ചുള്ള ദേശീയ ദിനാഘോഷ പരിപാടികള്‍ക്ക് ഒരുക്കങ്ങള്‍ പൂര്‍ത്തിയായതായി കാപിറ്റല്‍ സെക്രട്ടേറിയറ്റ് വൃത്തങ്ങള്‍ അറിയിച്ചു. പാതയോരങ്ങൾ പൂർണമായി അലങ്കരിച്ചിട്ടുണ്ട്. രാജ്യത്തി​​െൻറ 46ാമത് ദേശീയ ദിനവും 18ാമത് സ്ഥാനാരോഹണ ദിനവും സമുചിതമായി ആഘോഷിക്കുന്നതി​​െൻറ ഭാഗമായി വിവിധ പരിപാടികളാണ് ഒരുക്കിയിട്ടുള്ളത്. രാജ്യം വിവിധ മേഖലകളിൽ നേടിയ പുരോഗതിയും വളര്‍ച്ചയും, രാജാവ് ഹമദ് ബിന്‍ ഈസ ആല്‍ഖലീഫയുടെ ഭരണസാരഥ്യത്തിന് ശേഷം ബഹ്‌റൈന്‍ കൈവരിച്ച വികസനവും ആഘോഷ പരിപാടികളിലൂടെ രേഖപ്പെടുത്തു​മെന്ന് കാപിറ്റല്‍ സെക്രട്ടേറിയറ്റ് ഡയറക്ടര്‍ മുഹമ്മദ് ബിന്‍ അഹ്മദ് ആല്‍ഖലീഫ വ്യക്തമാക്കി.

പ്രധാനമന്ത്രി പ്രിന്‍സ് ഖലീഫ ബിന്‍ സല്‍മാന്‍ ആല്‍ഖലീഫയുടെ നേതൃത്വത്തിലുള്ള സര്‍ക്കാര്‍ പുരോഗതി ലക്ഷ്യമിട്ട്​ നിരവധി പ്രവര്‍ത്തനങ്ങളാണ് നടത്തുന്നത്. സാമ്പത്തിക വളര്‍ച്ച ഉറപ്പുവരുത്തുന്നതിൽ കിരീടാവകാശിയും ഒന്നാം ഉപപ്രധാനമന്ത്രിയുമായ പ്രിന്‍സ് സല്‍മാന്‍ ബിന്‍ ഹമദ് ആല്‍ലഖീഫയുടെ നിര്‍ദേശങ്ങളും നയങ്ങളും ശ്രദ്ധേയമാണ്​. ജനങ്ങളുടെ രാജ്യത്തോടുള്ള കൂറും സ്‌നേഹവും പ്രകടമാക്കാനുള്ള അവസരമാണ് ദേശീയ ദിന പരിപാടികളിലൂടെ സാധ്യമാവുന്നത്. 
 അലങ്കാരത്തി​​െൻറ ഭാഗമായി പ്രധാന പാതയോരങ്ങളിൽ നാലര ലക്ഷത്തോളം പൂച്ചെടികള്‍ നട്ടിട്ടുണ്ട്​. ഇതെല്ലാം പുഷ്​പിച്ച്​ മനോ ഹരമായ കാഴ്​ചയാണ്​ സമ്മാനിക്കുന്നത്​. 

ശൈഖ് ഖലീഫ, അല്‍ഫാതിഹ്, കിങ് ഫൈസല്‍, കിങ് അബ്​ദുല്ല ഹൈവേകളിലും സീഫ് ഏരിയ, അദ്‌ലിയ റെസ്‌റ്റോറൻറ്​ ഏരിയ, ബഹ്‌റൈന്‍ ബേ, ഗുദൈബിയ പാലസ് എന്നീ ജങ്ഷനുകള്‍ക്ക് സമീപവും പൂച്ചെടികള്‍ നട്ടിട്ടുണ്ട്. കൂടാതെ പ്രധാന ഹൈവേകളില്‍ ബഹ്‌റൈന്‍ പതാകകളും തോരണങ്ങളും വൈദ്യുതി വിളക്കുകളും കൊണ്ട് അലങ്കരിച്ചിട്ടുമുണ്ട്. ഡിസംബര്‍ 15ന്​ വാട്ടര്‍ ഗാര്‍ഡന് സമീപം വൈകീട്ട് മൂന്ന് മുതല്‍ രാത്രി 10 വരെ പൊതുജനങ്ങളുടെ പങ്കാളിത്തത്തോടെ ആഘോഷ പരിപാടികളും ഒരുക്കിയതായി അദ്ദേഹം കൂട്ടിച്ചേര്‍ത്തു.