You are here

ചെറിയ വീട്ടിലും വലിയ കാഴ്​ചകൾ  (ഭാഗം ആറ്​)

  • വീടും കൂടും –പ്രശസ്​ത ആർക്കിടെക്​റ്റ്​ ഡിസൈനർ രാജേഷ്​ മല്ലർകണ്ടി എഴുതുന്ന പംക്തി

ചെറിയ സ്​പേസിൽ ഒരുക്കിയിരിക്കുന്ന ലിവിങ്​ റൂം. സീറ്റിങ്ങിനൊപ്പം ടി വി യൂണിറ്റും സ്​റ്റോറേജും നൽകിയിട്ടുണ്ട്​. (Square Designs)

വീട്​ വലുതാണെങ്കിലും ചെറുതാണെങ്കിലും അകത്തളം മനോഹരമാക്കാവുന്നതാണ്​. വിലപിടിപ്പുള്ള ഫർണിച്ചർ നിറക്കുന്നതിലോ ചുമർ അലങ്കാരങ്ങളിലോ അല്ല അകത്തളത്തി​​​​െൻറ ഭംഗി. വീടിനകത്ത് സൗന്ദര്യവും സൗകര്യവും ഒരുപോലെ ഇഴചേരണം. വീട്ടിലേക്ക് കയറിചെല്ലുന്ന ഇടം മുതല്‍ ഒരോ ഇടത്തിലും മനസുപതിയണം. അതാണ് ഡിസൈനറുടെ വിജയം. 

നിർമിക്കാനുദ്ദേശിക്കുന്ന വീടിെൻ്റ ആദ്യപ്ലാൻ ഡിസൈനർ തയാറാക്കുമ്പോൾ തന്നെ അടുക്കള സിങ്കി​​​​​െൻറ വലുപ്പം മുതൽ ഫ്ലവർ വേസി​​​​െൻറ സ്ഥാനം വ​െര അറിയാൻ കഴിയും. അകത്തള വസിസ്​തീർണവും ഉൾപ്പെടുത്താവുന്ന സൗകര്യങ്ങളുമെല്ലാം ഇൗ ഘട്ടത്തിൽ തന്നെ  വ്യക്തമാണ്​. ഫർണിച്ചർ ലേ–ഔട്ടോടുകൂടിയ പ്ലാൻ ചെയ്താൽ സ്​കെയിൽ പ്രകാരം ആയതുകൊണ്ട്​  തന്നെ മുറിക്കുള്ളിലെ സൗകര്യങ്ങൾ എങ്ങനെ ആയിരിക്കുമെന്ന് ക്ലൈൻ്റിന് വ്യകതമായി മനസ്സിലാക്കാൻ സാധിക്കും. അതുകൊണ്ട്​ വീടുപണിക്ക്​ ശേഷം അകത്തളം വിശാലമല്ലെന്ന പരാതി ഉണ്ടാവില്ല. 

എന്നാൽ ഫർണിച്ചർ ലേഔട്ട് ഇല്ലാത്ത പ്ലാനുകളാണ്​ ഡിസൈനർമാർ നൽകുന്നതെങ്കിൽ പണിതീരു​േമ്പാൾ പരാതികളുമുയരും. ഇത്തരം പ്ലാനുകൾ വെച്ച്​ അവസാന മിനുക്കുപണികളും കഴിഞ്ഞ്​ ഫർണിച്ചർ നിരത്തുമ്പോഴാണ് മുറിക്കുള്ളിൽ ശരിയായ രീതിയിൽ സഞ്ചരിക്കാനുള്ള ഇടമില്ല, വാതിലിനടുത്തേക്ക്​ ഫർണിച്ചർ തള്ളിനിൽക്കുന്നു തുടങ്ങിയ പ്രയാസങ്ങൾ ഉണ്ടാവുക.  സ്ഥലപരിമിതിയിൽ ഡൈനിംഗ് ചെയറുകൾ നീക്കിയിട്ടും സോഫമടക്കിവെച്ചുമെല്ലാം നടക്കേണ്ടി വരും. വീടിനുള്ളിൽ ഫർണിച്ചർ ഇട്ടുകഴിഞ്ഞാൽ നല്ല രീതിയിൽ നടക്കാനുള്ള സ്​ഥലമുണ്ടോയെന്ന്​ ഉറപ്പുവരുത്തി വേണം ഇൻറീരിയർ ഡിസൈൻ ചെയ്യാൻ. 

ലിവിങ്​ സ്​പേസും ഡൈനിങ്ങും ഒരേ ഹാളിൽ സജീകരിച്ചിരിക്കുന്നു.
 
ചെറിയ വീടുകൾ നിർമിക്കുമ്പോൾ കൂടുതൽ ഉപയോഗിക്കുന്ന മുറികൾക്ക് പ്രാധാന്യം നൽകി അതിെൻ്റ വലിപ്പം കൂട്ടുകയും ആവശ്യമില്ലാത്ത അല്ലെങ്കിൽ ഒഴിവാക്കാൻ പറ്റുന്ന മുറികൾ വേണ്ടെന്ന്​ വെക്കുകയും ചെയ്യുക. കുറഞ്ഞ വിസ്​തീർണവും ചെറിയ ബജറ്റുമാണെങ്കിൽ കഴിവതും സ്റ്റോർ, പൂജ, ബാൽക്കണി, തുടങ്ങിയവ ഒഴിവാക്കണം. വ്യക്തമായ പ്ലാനിങ്ങോട് കൂടി നിർമിക്കുന്ന വീടുകളിൽ കൂടുതൽ സൗകര്യവും ഭംഗിയും ഉണ്ടാക്കിയെടുക്കാൻ നമുക്കാകും.  

ചെറിയ വീടല്ലേ, അകത്തളം ഇടുങ്ങിയതാകുമെന്ന മുൻധാരണ വേണ്ട. കഴിവുറ്റ ഒര​ു ഡിസൈനർക്ക്​ ചെറിയ വീട്ടിലും വിശാലമായ കാഴ്​ചയൊരുക്കാൻ സാധിക്കും. അതിനുള്ള ചില പൊടിവിദ്യകളാണ്​ ഇനി പറയുന്നത്​.

ഒാപ്പൺ ഡിസൈൻ
ബെഡ്റൂമുകൾ ഒഴികെ ബാക്കി മുറികളെല്ലാം നേരിട്ടുകാണുന്ന രീതിയിൽ ചുമരുകൾ ഇല്ലാതെ നിർമ്മിക്കുകയാണെങ്കിൽ കാഴ്ചയിൽ അകത്തളത്ത്​ വലിയ വീടിെൻ്റ വിശാലത ഉണ്ടാക്കും. ഇത്തരം നിർമ്മാണത്തിൽ ഒരു മുറിയിൽ നിന്നും മറ്റൊരു മുറിയിലേക്കുള്ള പ്രവേശന ഓപ്പണിങ്ങുകൾ ലിൻ്റൽ ഹൈറ്റിൽ കൊടുക്കാതെ മെയിൻസ്ലാബിനു തൊട്ടുതാഴെയായി ബീം ചെയ്താൽ വീടിെൻ്റ അകത്തളം ഉയർന്നുവിശാലമായി കാണാം. 

ഫർണിച്ചറിലും ശ്രദ്ധിക്കാം

ലളിതമായി ഡിസൈൻ ചെയ്​ത ഫർണിച്ചർ കൃത്യമായ ലേ–ഔട്ടോടു കൂടി യഥാർഥ സ്​ഥാനത്ത് വെയ്ക്കുകയാണെങ്കിൽ അകത്തളത്തിന്​  വലുപ്പം തോന്നിക്കും.  ഒരോ മുറിയുടെയും ഘടനക്കും വലുപ്പത്തിനും ആവശ്യത്തിനും ഇണങ്ങുന്ന ഫര്‍ണിച്ചര്‍ തെരഞ്ഞെടുക്കണം. ഫർണിച്ചർ വാരി നിറക്കാതെ ഒരാൾക്ക്​ യഥേഷ്​ടം നടന്നുപോകാനുള്ള ഇടവും വാതിലി​​​​െൻറ സ്ഥാനവുമെല്ലാം നോക്കി വേണം അത്​ ക്രമീകരിക്കാൻ. ഫർണിച്ചറുകൾ തെരഞ്ഞെടുക്കുമ്പോൾ നിറങ്ങൾക്കും പ്രാധാന്യം നൽകണം. ചെറിയ ഒരു മുറിയിൽ കറുത്ത ഒരു സോഫ ഇടുന്നതും ഇളം നിറത്തിലുള്ള സോഫ ഇടുന്നതും ശ്രദ്ധിക്കുക. ഇളം നിറത്തിലുള്ള സോഫ ഇട്ട മുറിക്ക് കൂടുതൽ വിശാലത തോന്നിക്കും.  ലിവിങ്​ സ്​പേസിൽ മൾട്ടിപർപ്പസ്​ ഫർണിച്ചർ ഉപയോഗിക്കാം. 

സോഫ്​റ്റ്​ ഫർണിഷിങ്​
മുറി ചെറുതെങ്കിൽ ജനലി​നും വാതിലിനുമിടുന്ന കർട്ടണിലും ഇളം നിറങ്ങൾ പരീക്ഷിക്കാം. ജനലിൽ ഇരുവശങ്ങളിലേക്കും നീങ്ങികിടക്കുന്ന ഞൊറിയുള്ള കർട്ടണോ, മുകളിലും താഴെയുമായി ജനലിനേക്കാളും വലുപ്പത്തിൽ കർട്ടൻ ഇടുന്നതിനോ പകരം ജനലിനുള്ളിൽ നിൽക്കുന്ന റോളർബ്ലൈൻഡ്സ്​ ഇട്ടാൻ മുറി വിശാലമാണെന്ന്​ തോന്നും. 

ചുമരുകൾ ഇളം നിറത്തിലുള്ള പെയിൻറ്​ ചെയ്തും തറയിലെ ടൈലുകൾ ഇളം നിറമാക്കിയും നിർമിച്ചാൽ വീടിെൻ്റ അകത്തളം വലുതായി തോന്നും. 

(കോഴിക്കോട്​ ഇൗസ്​ഹില്ലിൽ സ്​ക്വയർ ആർക്കിടെക്ച്ചറൽ ഇൻറീരിയർ കൺസൾട്ടൻറ്സ് എന്ന സ്ഥാപനത്തി​​​​​​​​​​​​െൻറ സാരഥിയാണ് ലേഖകൻ. 27 വർഷമായി ഡിസൈനിങ്​ രംഗത്ത്​ പ്രവർത്തിച്ചു വരുന്നു. ആർക്കിടെക്​ചർ മാസികകളിലും അനുകാലിക പ്രസിദ്ധീകരണങ്ങളിലും ലേഖനങ്ങൾ എഴുതുന്നു. ഫോൺ: 919847129090. rajmallarkandy@gmail.com)

COMMENTS