പെട്രോളും മഴയും അമേരിക്കയും വയറ്റത്തടിക്കു​േമ്പാൾ

ഉള്ളി 165 രൂപ, തക്കാളി 75 രൂപ. ചാക്കി​​െൻറയും പെട്ടിയുടെയും വിലയല്ല. ഒരു കിലോയുടെ വിലയാണ്​. ഉപ്പ്​ മുതൽ കർപ്പൂരം വരെ സകല സാധനങ്ങൾക്കും വിപണിയിൽ തൊട്ടാൽപൊള്ളുന്ന വിലയാണെന്ന്​ സാക്ഷ്യപ്പെടുത്തുന്നത്​ മറ്റാരുമല്ല, കേന്ദ്ര സ്​ഥിതിവിവര വകുപ്പാണ്​. പെട്രോൾ വില വർധനവ്​ മുതൽ അമേരിക്കൻ നയംവരെയുള്ള കാരണങ്ങളാൽ ഉപഭോക്​തൃ വിലസൂചിക കഴിഞ്ഞ നാലുമാസംകൊണ്ട്​ കുത്തനെ ഉയർന്നതായാണ്​ സ്​റ്റാറ്റിസ്​റ്റിക്​സ്​ ആൻഡ്​​ പ്രോഗ്രാം ഇംപ്ലിമെ​േൻറഷൻ മന്ത്രാലയം വിശദീകരിക്കുന്നത്​.

ജൂണിൽ 1.46 ശതമാനം ആയിരുന്ന ഉപഭോക്​തൃ വിലസൂചിക​ സെപ്റ്റംബറിൽ 3.28 ശതമാനമായും ഒക്​ടോബറിൽ 3.58 ​ശതമാനമായുമാണ്​ ഉയർന്നത്​. ഭക്ഷ്യ^പാനീയങ്ങളുടെ വില നിലവാരമാണ്​ കുത്തനെ ഉയർന്നത്​. വിശേഷിച്ച്​ പച്ചക്കറി ഇനങ്ങൾക്ക്​. പച്ചക്കറി ഇനങ്ങളുടെ വില വർധനവിന്​ പതിവുപോലെ മഴയെയാണ്​ കുറ്റം ചാർത്തുന്നത്​. ദക്ഷിണേന്ത്യൻ സംസ്​ഥാനങ്ങളിൽ വിളവെടുപ്പ്​കാലത്ത്​ കനത്ത മഴ പെയ്​തതിനാൽ ഉള്ളിയും തക്കാളിയുമടക്കം നശിച്ചുപോയെന്നും അതുവഴിയുള്ള ക്ഷാമമാണ്​ വിലവർധനവിന്​ കാരണമെന്നുമാണ്​ വിശദീകരണം. സെപ്​റ്റംബർ, ഒക്​ടോബർ മാസങ്ങളിലായി പച്ചക്കറി വിലയിൽ ഇരട്ടിയിലേറെയാണ്​ വർധനവെന്നും ഉപഭോക്​തൃ വിലസൂചികയുടെ വിശദാംശങ്ങളിൽ വ്യക്​തമാക്കുന്നു. 

അരിയും ഗോതമ്പുമടക്കം ഭക്ഷ്യധാന്യങ്ങൾ, പയർ വർഗങ്ങൾ, പഞ്ചസാര, ഭക്ഷ്യ എണ്ണകൾ തുടങ്ങിയവയുടെ വില വർധനവിന്​ കാരണമായിരിക്കുന്നത്​ അടിക്കടിയുള്ള ഇന്ധനവില വർധനവും. അന്താരാഷ്​ട്ര തലത്തിൽതന്നെ കഴിഞ്ഞ മൂന്നുമാസമായി ഇന്ധനവില ഗണ്യമായി വർധിച്ചിട്ടുണ്ട്​. കഴിഞ്ഞ ഒന്നരവർഷമായി ബാരലിന്​ 50^55 ഡോളർ എന്ന നിലയിൽ തുടർന്നിരുന്ന ക്ര​ൂഡോയിൽ വില കഴ​ിഞ്ഞമാസങ്ങളിൽ ബാരലിന്​ 64 ഡോളർ എന്ന നിലയിലേക്ക്​ ഉയർന്നു. 
ഇതോടൊപ്പം, ദേശീയ തലത്തിൽ ദിനന്തോറും പെട്രോൾ, ഡീസൽ വില വർധിക്കുന്നുമുണ്ട്​. ഇതോടെ ചരക്ക്​ കടത്ത്​ കൂലിയിലുണ്ടായ കുതിച്ചുകയറ്റമാണ്​ ഇൗ വസ്​തുക്കളുടെ വില വർധനവിന്​ കാരണമായി വിശദീകരിക്കുന്നത്​. ഇതേ​ാടൊപ്പം, കൊറിയൻ പ്രശ്​നത്തിൽ അമേരിക്കൻ പ്രസിഡൻറ്​ ട്രംപ്​ ഉയർത്തുന്ന യുദ്ധഭീഷണി അന്താരാഷ്​ട്ര തലത്തിൽതന്നെ വില വർധനവിന്​ കാരണമാകുന്നുമുണ്ട്​. ഇറക്കുമതി ചെയ്യപ്പെടുന്ന ഉൽപന്നങ്ങളു​െട വില വർധനവിന്​ ഇതാണ്​ മുഖ്യ കാരണമായി വിശദീകരിക്കുന്നത്​.